الأحد، 22 أبريل، 2012

نعــم ما زلـــــــت أنســه !!!





نعم ما زلت أنسه !!!

ليه الناس دايما بتحب تجرح بعض
ليه دايما تدور على نقط ضعف الغير وتدوس عليها
على الرغم من كل حاجه فى دنيا قسمه نصيب
مكتوبلنا هنقابل مين ونتكلم مع مين وهنعرف مين وهنحب مين
كل شىء مقدر ومكتوب  ومفيش حاجه بأدينا
وعلى رأى المثل ( الى مكتوب على الجيبين لازم تشوفه العين )
لو كل واحد عرف كده هنعيش فى راحه بال
الى يقولك يا حرام انتى لسه متجوزتيش مع انك حلوة وزى القمر ( شكرا والله )
والى يقولك متشوفى شيخ ولا حاجه ليكون حد عملك عمل
 ( عمل ايه بس الله يكرمك )
والى تقول تلاقيكى متنكه وشايفا نفسك ياختى الواحده ملهاش غير انها تتجوز وتعد فى البيت 
( طيب هو احنا حررنا المرأه ليه اصلا فينك يا قاسم يا امين )
كله كوم ولما وحده تقابل صحابتها بعد فتره من الزمن
وتلاقيها معها اولادها ( ربنا يخليهم لها يارب )
ايه ده انتى لسه متجوزتيش ياحرام ليه بس طيب والله انتى كده احسن بلا جواز بلا نيله
ياعنى الى اتجوزه خده ايه وتقوم ماشيه وتقول  بصوت واطى ياعينى عليها الحمد لله انى اتجوزت بدرى ( ياستى متخفيش مش هحسدك ولا حاجه انا اصلا مش مستعجله على الجواز انا لو مستعجله كنت اتجوزت اول واحد اتقدم وخلصت زيك برضه )
كل الى فات ده حماده وكل الى جاى حماده تانى خالص ههههه
نيجى بقى للست الوالده ( ربنا يخليها يارب ويديها الصحه )
مفيش حد بتكلمه الا وتكلمه عن بنتها البنت اتاخرت فى الجواز البنت كل الى يجلها ترفضه
خايفه يكون مش عارف مين عاملها عمل وياسلام بقى لو جرتنا اتخطبت قبليها
شايفا البنات هى دى البنات الشاطره مش زيك خايباه خليكى اعده كده جمبى
وعلى رأى المثل برضه
( طلعت فوق السطوح هز الهوا كمى كل البنات اتجوزت وانا لسه جمب امى )

ولو فى فرح تنزل تجبلها احسن طقم ( دلوقتى الفلوس بتطلع )
وتخدها معاها  وتعرفها على كل المعازيم ( شفت بنتى اموره ازاى )
وطبعا البنت بتبقى محرجه جدا ومش عارفه تعمل ايه
ولاالحبايب والاصحاب كل شويه يجبولها عريس ولا هو مناسب
ولا ينفع يفتح بيت اصلا ياعنى هما  مش واخدين بالهم منها مثلا
ولا هى رخامه وخلاص طيب الى يجيب يجيب حد مناسب 
مش سلق بيض ياعنى
 وياعنى كله على البنت فى الاخر 
طيب ياعنى البنت تعمل ايه توافق على اى حد وتتجوز اى حد وخلاص
لمجرد انها تترحم من لسان الناس
طيب  لو اتجوزت اى حد ممكن متبقاش مبسوطه معاه ممكن متحبوش
ولا تتجوز وخلاص واهو تلحق تجيب طفل ولا اتنين يونسوها لما تكبر وتعجز واهى برضه تترحمت من لقب  (عانس )
وتعيش باقى حياتها تعيسه عشان مخترتش الى هيا كانت بتحلم بيه 

طيب ماهى ممكن تتطلق ويتقال عليها مطلقه
ومش هتخلص من كلام الناس عليها برضه
والناس مبترحمش طبعا كلنا عارفين
طيب ما هوكده كده الناس هتتكلم 
مش كده ولا ايه ؟؟
طيب دلوقتى  عندى سؤال
ايه الافضل من وجهه نظركم البنت تفضل من غير جواز وتمارس حياتها بشكل طبيعى ؟
ولا تتجوز وتعيش زى ماكتير عايشين والاسم انها اتجوزت وخلصت من شبح **العنوسه **
 ( وأهو ضل راجل ولا ضل حيطه ) ؟







هناك 24 تعليقًا:

P A S H A يقول...

الموضوع ده كبير .. وبقالي فترة باحوم حواليه وباجمع أفكار بس لسه ما كتبتش فيه .. وإن كنت عارف إني مش هاكتب فيه بنفس المباشرة والأسلوب الجميل ده :)

رأيي -الشخصي كواحد متجوز- بالنسبة لسؤالك اللي هو سؤال كثيرات وكثيرين برضه .. وما تاخديش الكلام بمحمل شخصي لأني ما أعرفش حضرتك وأول مرة أدخل مدونتك فده هايديني الجرأة في أني أتكلم بصراحة شوية من غير مجاملة .. الجواز نصيب .

طب من هنا لحد ما ييجي الجواز ؟؟ .. حياتك ماشية إزاي ؟؟ عارف الضغط اللي بيقع على البنت والرغي والزن والتنغيص بالكلام لأن كلنا في بيوتنا عندنا بنات وعارف حاجات تانية كتير بتحصل ما يصحش أنها تتقال .. طب لحد ما ييجي العريس المناسب أو ابن الحلال اللي ربنا كاتبهولك هاتعملي إيه ؟؟ .. وافرضي أنه جه فعلاً دلوقت هاتقدري تحكمي عليه بأنه مناسب ليكي ولا لأ ؟؟ .. هل هاتشطحي بخيالك وبأحلامك ولا هاتوافقي بواحد أقل منك عشان تخلصي وخلاص ؟؟ .. تقدري لو اتجوزتي النهارده تشيلي مسئولية زوج وبيت وأسرة و..... ؟؟ .. متخيلة شكل حياتك هايبقى عامل إزاي بعد الجواز ؟؟ .. مرتبة أولوياتك إزاي ؟؟ .... واسئلة كتير غيرها لازم تتسئل دلوقت وتجاوبي عليها بمنتهى الصراحة .. الموضوع مش جواز .. الموضوع فيما وراء الجواز .. المسئولية ومواجهة الحياة ومواجهة نفسك !
دلوقتي أنتي متداريه في أهلك / شغلك / صحابك / اهتماماتك .. بعد كده هاتبقي لوحدك !
الجواز مش وحش خالص والله بالعكس استقرار وسكن وحياة جديدة حلوة .. بس امتى ؟؟ لما يبقوا الاتنين عاوزين ده ومتفقين عليه .. اختلاف الشخصيات - في حدود معينة - مش قضية طالما بيكملوا بعض وقلبهم على بعض وعاوزين يعيشوا مع بعض :)

رغيت كتير أنا عارف وصدعتك .. ووالله ما أقصد تهكم ولا إساءة ولا إستفزاز لحضرتك .. أنا فعلاً الموضوع كنت عاوز أكتب فيه من فترة ولقاني عندك :))

تقبلي مروري واحترامي وتقديري

ياره عبدالله يقول...

انا سعيده جدا بحضرتك وبوجودك
وسعيده ان الموضوع نال اعجابك
وانت مطولتش ولا حاجه بالعكس وانا مضيقتش بالعكس انا رأى زى رايك
الجواز مش لعبه ولا زم يكون مبنى على اسس معينه ولازم يكون الاتنين متشابيهين او مكملين لبعض او مناسبين لبعض
انا عايزة اقول ليه المجتمع بينظر للبنت الى اتاخرت عن الجواز انها عانس وانها فيها عيب
والكلام يكتر فى النقطه دى متسيبوا الناس فى حالهااتجوزت متجوزتش ده لاهيزيد منها ولا هينقصها ليه مبساويش فى المعاملها ما بين الشاب وبين البنت
فعلا بجد المجتمع بيظلم البنت فى كل حاجه
سعيده بوجودك وسعيده برأيك جدا جدا
واتمنى متكونش زيارتك الاخيره.

دومتـ بكل الود ..
معـ خالص تحياتى ..

ظلالي البيضاء يقول...

أختي يارة ..
كلام الناس في بلادنا فعلاً مشكلة .. لكنه في مصر الحبيبة أكبر مصيبة ..
فعلاً ابتعدنا عن هدي نبينا صلى الله عليه وسلم كتيير ..
من أجمل ما قرأت من الحديث الصحيح عن النبي صلى الله عليه وسلم :"من كان يؤمن بالله واليوم الآخر فليقل خيراً أو ليصمت"
صدقي أن المرء ذكراً كان ام أنثى فقيراً كان أم غنياً .. مهما اختلفت شخصيته واهتماماته وإنجازاته فإنه لا يسلم من كلام الناس وانتقاداتهم التي لا تنتهي ..
حسبنا أن نلقي بكلام الناس خلف ظهورنا ولا نكترث له إلا لنصيحة تطرق آذاننا فنصغي لها ونأخذ بها ..
كوني بألف خير أختي .. وسواء تزوجت باكراً أو متأخرةً أو لم تتزوجي فأنت تتركين في هذه الحياة بصمةً طيبةً وأثراً طيباً .. وليس الزواج مقياس القبول عند الله أوالنجاح في الدنيا أوالفوز في الآخرة ..
لأن تبقى الفتاة بغير زوج خير لها من أن تتزوج بمن لا يحفظ لها كرامتها ويصون أخلاقها ..
بكل الحوال نسأل الله لك التوفيق والسعادة ..
مع التحية الطيبة ..
أخوك محمد الذهبي

د.ريان يقول...

صباح العطر ياره الراقية

وموضوع في الصميم وبجد بيحصل ورغم

التساؤل انا من الناس العزوبية وبصراحة حلو أن الإنسان يتزوج

ويكون أسرة ودي سنة الله في الكون بس على شرط لما يلاقي الي يستاهل
ولو خيرت بين زواج ممكن يكون فاشل والعزوبية باختار العزوبية طبعا
مش لأنها حرية والزواج مسؤولية بس لأني أبحث بداخلي عمن تفهمني
وبارفض الزواج العمياني الي خدوه فغلوه
كثير ناس متزوجة وعندها ابناء ومتورطة في الزواج لاهو قادر يطلق ولا هو قادر يعيش بمزاجه

وكثير طبعا ناس متزوجة وعايشة سعيدة وزي الفل اللهم لاحسد وزد وبارك

بس المسألة مش مجرد سؤال لأنها تعتمد

على تفكير الشخص مثلا على سبيل المثال ناخد العبد الفقير أنا كل عائلتي اتزوجت زواج تقليدي وروتيني

والزواج دا زي أختيار البطيخة ياتطلع مضروبة ياتطلع حلوة وزي العسل والكثير طبعا كان مضروب

الا طبعا جزء من عائلتي قليل أختارو يتزوجو عن حب وعايشين احلى حياة هنا رفضت اني اتزوج تقليدي وقلت ياعالم ينشرح لها قلبي واحبها يابلاش الزواج من اساسه واعيش ملك نفسي

هيا لو جت على الزواج وبس كان الواحد يتزوج وهو في الحضانة لكن المسألة تحتاج مشاعر وتمازج أرواح ودا الصعب

كثير ممن أعرفهم رومانسيين وزي الفل اتزوجو ناس لابيحبو الرومانسية ولاشغل افلام الابيض والأسود ومطلعين عين الي اتزوجوهم وعالم سطحيين جدا
وبيكرهو اليوم الي اتزوجو فيه

علشان كدا يتأخر الزواج ويطلع مناسب ويقعد مليون سنة ولا يتزوج الواحد ويفاجىء بشخصية الإنسان

ناس كثير زي الوالدة بتضغط عليا والخالات زي موضوع والدتكِ ربنا يحفظها
بس باقول لهم هو مين فينا الي راح يتزوج ؟انا ولا ؟أنتم

بيقولو لي ..لازم تتزوج علشان تلحق تربي اطفالك في سن مزبوط

ياسلام على الكلام يعني اجيب اي وحدة وخلاص ونخلف حتى لو طلعت وحدة مااتفق معاها

علشان خاطر الابناء لا طبعا

والي يقولك البنات زي الرز في العائلة ومش معقول ماعجبتك ولا وحدة

ياعيني هو مزاد علشان اذا كثرو لازم اخد وحدة

مشكلة الزواج مش في الزواج نفسه بل في اراء المجتمع ونظرته للعزوبية والعوانس

كلهم يتلمو عليك لحد ماتتزوج وفي حالة لا قدر الله طلع زواجك مضروب واتطلقت
كلهم يهربو منك ونظرة المجتمع للمطلق والمطقلة سيئة جدا

طالما انها حياتكِ أنا اشوف تكون عزوبية لحد ماتلاقي الشخص المناسب لو ربنا كتب لكِ الزواج

اما انه نغامر ونوافق على اي حد يدق الباب دي مغامرة خطيرة جداً
ولو نفرض مثلا حبيتي تتزوجي قريب ولقيتي شخص حاولي تطولي فترة الخطوبة لحد ماتعرفي ميته

لأنه مشكلة الخطوبة وبدايات الزواج الكل بيكون ملاك ولازم عشرة علشان نعرفه

انا عن نفسي وفي رأيي الشخصي أفضل أكون عزوبي لحد مالاقي فعلاً الي ارتاح لها وتكون حنونة ومثقفة واهم حاجة الأرتياح النفسي للشخص

مش باقولك انه عندي شروط صعبة تعجيزية لا والله اغلب العزوبيين بسيط جداً وطلباته الستر وحياة حلوة

بس الموافقة على الزواج صارت صبعة بدا الجيل جداً بحكم الانفتاح والتطور
وكثرت العلاقات فلازم الواحد يفكر ألف مرة قبل مايعلن أي أرتباط

موضوع رائع رائع ياياره وخلاني افضفض :)

سعدت بمروري هنا هذا الصباح

دمتم بكل ود

ياره عبدالله يقول...

ظلالى البيضاء
فعلا كلام الناس فى مصر اكبر مصيبه
سواءكانت الطبقى فقيره او غنيه
كل الناس بتتكلم
بس انا شايفه ان البنت هى المظلومه اكتر
واكثر الوم على البنت اكتر
اتمنى اشوف فى يوم من الايام اسلوب التفكير ده يتغير ومنعملش البنت انها كائن غير مرغوب فيه او عقبه لينا فى الحياه
ونتبع سنه رسول الله عليه افضل الصلاه والسلام
سعيده جدا بمرورك
وسعيده برايك جدا بجد
دومتـ بكل الودأخى محمد

ياره عبدالله يقول...

هههههههههههه يا جماعه الموضوع مش شخصى خالص
انا بتكلم بشكل عام انا اصغر اخواتى وولدتى مش عايزة تجوزنى اصلا بس هيا نفسها طبعا ياعنى بس مش بتضغط عليا كده
ده بس للأضاحه مش اكتر

ياره عبدالله يقول...

د. ريان

تصدق انى اول مره اعرف ان المشكله دى مش عند البنات بس كمان عند الشباب نفس الشىء.
معاك جدا ان الجواز عامل زى البطيخه
وعلى فكره ده سواء عن حب او جواز تقليدى
برضه الجواز عن حب مش مضمون
اتمنى لك حياه سعيده واتمنى انك تجد انسانه تحبها وتحبك
سعيده جدا بان كلامى اسعدك
وسعيده بفضفتك جدا
وسعيده بمتابعتك ليا بجد
وربنا يهدى الجميع

candy يقول...

معاكى فى كل كلمة ..
سيبك من كلام الناس خالص .. دى عالم دماغها تعبانة ، وأمهاتنا ربنا يصبرهم.

مش هما عايزين ساعدتنا ؟؟ سعادتنا مش فى بيت مع واحد شخص لايطاق .. ساعتها لا الأم ولا الصديقات ولا الجيران ماينفعوكى ..

مجتمع مريض ، والحل السهل الصعب .. أنك تعيشى زى ما انتى عايزة وتحاولى الكلام مايأثرش فيكى :)

ياره عبدالله يقول...

candy
سعيده برأيك جدا
وانتى عندك حق محدش هيقف جمبنا ولا حد هيعوضنا على الى فات
شكرا ليكى جدا
وشكرا لوجودك الجميل دة

ياره عبدالله يقول...

candy
سعيده برأيك جدا
وانتى عندك حق محدش هيقف جمبنا ولا حد هيعوضنا على الى فات
شكرا ليكى جدا
وشكرا لوجودك الجميل دة

faroukfahmy58 يقول...

يارة عبدالله
شديد اسفى لتأخيرى فى التعليق
وغدا انشاء الله سيكون لى معك ردا خاصا يجب الاعداد له بما يتفق ومكانة ما تكتبين

ياره عبدالله يقول...

أستاذ فاروق
مساء الفل على حضرتك
وانا أقل بكثير بمتابعه حضرتك واهتمامك بالرد عليا وانا فى انتظار حضرتك وكلى شغف .

nona saad يقول...

موضوع فعلا مهم احييكي علي شجاعتك انك اتكلمتي فيه بحريه في بنات الموضوع بالنسبه لهم مكسف ومحرج بس عاوزة اقولك علي حاجه الجواز ده قسمه ونصيب اولا واخيرا ولازم تحسني الاختيار وتفكري كويس قبل ما تختاري وده حقك تخيروا نطفكم فالعرق دساس والناس في حميع الاحوال بتتكلم حاولي تاخدي الموضوع من الجانب الايجابي بتاعه وسيبك من النقد السلبي اللي لا يودي ولا يجيب ده يخليكي تتمسكي بمبادئك اكتر بس ادعي ربنا دايما انه يرزقك الزوج الصالح المتدين اللي يعرف قيمتك ويسعدك :) وان شاء الله قريب نهنيكي علي الاختياار السديد ان شاء الله
ده اول مرور ليا في المدونه استمتعت جدا بتصفحها وان شاء الله ليست الاخيرة :)

faroukfahmy58 يقول...

ارجع اليك يارة
بالنسبة للسؤال فانا افضل ان تتزوج ويمكن الحب ييجى بعد الزواج فكما لا غنى عن الرجل لا غتى ايضا عن حواء
وحواء هى الموده والرحمه
ولا يمكن للمراة ان تفضل من غير زواج ولا يمكن للرجل ان يعيش بدونها
فانا اتصور ان الرجل او المراة كالتار اذا اقتربت منها بشدة تحرقك واذا ابتعدت عنها كثيرا تكون لوحا مثلجا فالزواج ارحم مهما كانت نتائجه بس بدون خلافات ويتحمل كل طرف هموم الآخر
ربنا يستر يا ياره

نيللى يقول...

يابنيتي هؤلاء هم البشر

( مش مريحين نفسهم بتيتاً بتيتاً)

أنا أهو متجوزه ومش مريحين نفسهم لسه محملتيش مفيش حاجة في السكة حاجة بجد قرف في قرف

فعشان تريحي نفسك

سبيها علي الله

ومن توكل علي الله فهو حسبه

ياره عبدالله يقول...

nona saad
سعيده جدا بمرورك واتمنى انك تتبعنى على طول
وانا معاكى جدا ان الناس فى جميع الاحوال بتتكلم .
ربنا يرزق جميع البنات الزوج الصالح
وجميع الناس يحققه كل ما يتمناه
وادعو من ربى ان يحققلك كل ماتتمنى .
اشكرك

ياره عبدالله يقول...

استاذى العزيز
استاذ فاروق
بجد مش عارفه اوصف لحضرتك مدى سعدتى بوجودك ومتابعتك .
بس أسمحلى ان أختلف معاك فى الرأى
حضرتك مثل ابى وتتحدث مثله ايضا
تتحدث بخوف من المستقبل
لاكن أسمحلى أقول لك ان المستقبل بيدى الله
ولا أحد يقدر يحدد مستقبله
لو حضرتك تقصد ان الزواج حمايه للبنت
فده مش صح
يجب علينا ان نتختار الزوج المناسب
واذا لم يأتى نصبر فالبنت فى الوقت الحالى بقت أقوى بكثير من زمان
ونقدر ان نكمل حياتنا ونحمى انفسنا من اى ضرر
انا عارفه اننا لازم نتجوز وان دى سنه الحياه وكل البنات نفسها فى الامومه
وانا مثلهم ولاكن مش مع اى حد
الجواز مش مجرد رجل وامرأه وخلاص
لازم يكون على الاقل فى مشاعر مش حب بس يكون فى ارتياح فى قبول وزى ماحضرتك قلت الحب يجى بعد الجواز
انا بعتذر لحضرتك على ردى وعلى اختلافى مع حضرتك بس انا نفسى ولدى يفهم كلامى ده ويستوعبه
احنا مش عايزين نحب الاول وبعدين نتجوز لا خالص
احنا مقتنعين ان الحب بيجى بيجى سواء قبل الجواز او بعده
ولا كن احنا بندور على الراحه النفسيه
على الكميا بينا ياعنى يكون على الاقل فى توافق بينا والحب يجى بعدين .
اشكر حضرتك جدا جدا جدا
واتمنى ان حضرتك متزعلش منى
وأعتذر لحضرتك على اختلافى فى الرأى.

ياره عبدالله يقول...

نيللى
(من توكل علي الله فهو حسبه)
ونعم بالله
ربنا يهدى الجميع
ويشغل الناس الفاضيه الى مورهاش غير
إِيذاء الغير وبس
وربنا يرزقك بكل ما تتمنى
ويرزقك براحه البال.
شكرا لك

رقة الندى يقول...

سالخير عليكى ياحبى
دايما متاخرة انا كالعادة:(
حساكى بتوصفى حالى فى الكلام يا بت انتى هههههه
بس انا اخيرا سلمت ورفعت الراية البيضاء:ي
زهقت بقا مليت معرفش والله اية خلانى اوافق
يمكن عشان ماما او اخواتى او اللى حواليا
او لان الوضع بيختلف جدا مع بنت الاياف عن بنت المدينة
المهم اهه وافقنا على الخطوبة اخيرا

جايز مش بقتناع منى .. بس كل اللى حواليا عيزين كدا
وانا خلاص قررت اسلم
وربنا الموفق

موضوع مهم وجامد اوى
تسلم ايدك يااصغر عروسة معترضة على الوضع:*

ياره عبدالله يقول...

سالنور عليكى يا قمرى
قال تعالى: «الخبيثات للخبيثين و الخبيثون للخبيثات و الطيبات للطيبين و الطيبون للطيبات»
وانتى طيبه وعسوله وتستاهلى كل خير
واكيد اكيد هو مامته داعيله عشان انتى وفقتى عليه
ربنا يتمم عليكى بخير ياااااااااااارب
واشوفك احلى عروسه واجى البسك الطرحه
وصدقينى اهم حاجه يكون انسان طيب ويخاف عليكى مبروووووووووووووووووووووك يا احلى نوجا فى الدنيا مووووووووواه

elmassa يقول...

مساء بعطر الفيروز ايتها الاليقة

موضوع مهم وشاغل مساحة كبيرة فى حياتنا

ونظرة المجتمع مش بتتغير لمن فاتها / فاته سن الزواج واعتقد ان عمره النظرة دى ما هتتغير
لانها بئة من اساسيات المجتمع
ومع ان المرأة لايمكن ان تظل وحدها الا انها يجب ان تختار جيداً ولا تختار الا من يتوافق معها فكرياً وعاطفياً واجتماعياً ليكون زواج ناجح لكلا الطرفين
الزواج التقليدى هذه الايام لا ينبت اسرة سعيدة ، فى السابق لم تكن المرأة كما هى الآن .
وفى النهاية فهو قرار شخصى ويجب الا تؤثر قرارات الاسرة عليه لانه هو وحده من سيعانى الامرين ان فشل ، وان نجح وعاش سعيداً فهو من سعده هل يعلق مستقبله على وهم صاب او خاب

راق تواجدى هنا
ررررررررررئع تعبيرك
مع خالص تحياتى

ياره عبدالله يقول...

elmassa
يسعد مسائك عزيزتى
صح جدا ان نظره الناس مش هتتغير
واتمنى من ربنا ان يغير فكر الناس
ونبقى مجتمع ارقى وافضل
سعيده جدا بتواجدك وبتطلتك الجميله
واتمنى ان تنورينى على طول .
دومتـ بكل الود ..
معـ خالص تحياتى ..

الاحلام يقول...

شىء رائع عندما اقرأ عن هذا الموضوع موضوع الزواج وتاخر الزواج والسؤال التقليدى هى ليه متزوجتش لغايه دلوقتى ليه وبالذات فى الريف كتير جدا بيحصل الكلام ده ولو كل انسان يعرف ان كل شىء مكتوب فى الكتاب من الولاده حتى الممات ويقتنع بكده اكيد هيراح ويريح كل من حوله
موضوع رائع ومدونه اروع وقلم غايه فى الروعه اشكر الظروف التى جعلتنى اعرف مدونتك المميزه استمتع الليله هنا اتمنى ان تتقبلى مرورى المتواضع وتتقبلى تحياتى ابوداود

ياره عبدالله يقول...

الاحلام
اكيد الموضوع ده بيبقى اصعب فى الريف
فى المدن بتبقى البنت معتمده على نفسه شويه
بتقدر تشتغل وتعتمد على نفسها وتقدر تشغل نفسها من اى كلام
لاكن فى الريف الجو بيبقى محدود والضغط بيبقى اكبر .
استاذ ابو داود اشكر حضرتك جدا لحضورك الراقى
وانا اللى اتشرفت بمشاركتك لكلاماتى المتواضعه
دومتـ بكل الود ..
معـ خالص تحياتى ..